Барселона не успеа да ја мине групата од Лигата на шампионите, што не само што е историски спортски, туку и огромен финансиски дебакл.
Во буџетот за оваа сезона Барса вклучи бонуси за „барем четвртфинале на ЛШ“. Не ја помина ни групата.
Осиромашениот каталонски гигант, кој пред два месеци објави дека финансиската 2020/2021 ја заклучил со загуба од 481 милион евра, сега претрпе нов, двојно потежок удар. Барселона пред почетокот на актуелната сезона и официјално пресмета или „буџетираше“ дека ќе игра „барем четвртфинале“ во Лигата на шампионите. Со тоа што не се доближи до таа цел, оствари загуба од 20,2 милиони евра.
Со овој дебакл Барселона останува без засилувања
Ова се, значи, два нови големи во низата досега незамисливи неуспеси на Барселона, која по 15 кола во Ла Лига заостанува 16 бода зад водечкиот Реал и шест бода од зоната во Лигата на шампионите за следната сезона, без која остана во рана фаза оваа сезона. Шпанските медиуми пишуваат дека финансиски тоа значи дека Жоан Лапорта останал без парите кои пресметал дека ќе ги добие и дека ќе ги потроши за купување на толку потребните засилувања во зимскиот преоден рок, бидејќи без тоа Барселона останува во многу тешка ситуација и може само да донесе играчи на позајмица.
Единствена утеха би била освојувањето на Лига Европа
Единствено што би ја намалило загубата на Барселона од прераното испаѓање, е освојувањето на Лига Европа. Доколку триумфира во утешното натпреварување би заработила 14,9 милиони евра. Така споменатиот дефицит би се намалил на 5,3 милиони евра во однос на планираниот буџет. Сепак, мора да се нагласи дека продолжувањето на настапите во нокаут рундата од Лигата на шампионите, дури и без конечна победа, на Барселона ќе ѝ донесе далеку поголеми приходи од спонзори и телевизиски права од освојувањето на Лига Европа. Јасно е дека тоа што Барселона сега е во Лига Европа не значи дека е претплатена да ја освои, бидејќи има многу силни клубови.
Навивачите на Барса подобро да не ги гледаат финансиските извештаи на клубот
Во споменатиот финансиски извештај на Барселона се наведува дека во текот на финансиската 2020/2021 година, оперативните приходи на клубот изнесувале 631 милион евра, што е многу под буџетот од 828 милиони. Вклучуваше и нето добивка од еден милион евра, а не загуба од 481 милион евра, како што беше на крајот. Покрај тоа, трошењето на клубот се зголеми за 19 отсто во однос на минатата сезона, од 955 милиони на 1,136 милијарди евра, што е најмногу во историјата на клубот.
Клубот за тековната сезона 2021/2022 презентираше буџет со 765 милиони евра приход, а ова зголемување се должи главно на закрепнувањето со постепеното повторно отворање на стадионите и продавниците. Што се однесува до оперативните трошоци, од клубот очекуваат тие да бидат намалени, пред сѐ поради заминувањето на високо платените играчи, како и намалувањето на другите плати. Барселона очекува годината да ја заврши со загуба од 19 милиони евра. Сега со тоа што испадна од Лигата на шампионите и остана без 20,2 милиони евра на кои однапред се потпре, ја отежна и онака тешката финансиска состојба.
