Откако деновиве излезе на виделина астрономската плата која Антонио Конте ќе ја зема во Тотенхем, се огласи и самиот тој правдајќи се дека заслужува толку бидејќи одлично си ја врши работата.
Најтиражниот италијански весник, La Gazzetta dello Sport, откри дека Конте во неговиот нов клуб Тотенхем ќе има баснословна плата од 18 милиони евра по сезона, што предизвика лавина реакции во фудбалската јавност.
Конте и претходно во Интер имаше висока плата, што беше една од причините поради кои управата и реши да се откаже од неговите услуги, иако тој на клубот му го донесе првото Скудето после 10 години.
„Дали мојата плата ѝ штети на банката? Мислам дека голем удар прави кој и да ме земе. Работи си ја работата и тоа правилно како што треба. Јас тоа го правам со мојата и заслужувам да ме плаќаат толку“, рече Конте објаснувајќи ја астрономската сума во емисијата Le Iene.
Конте на Островот дојде како шампион, но таму го чека далеку од шампионска битка. Клубот од Лондон е во незавидна ситуација и успех сезонава ќе биде доколку успее да се пласира на едно од местата кои водат во Лигата на шампиони.
„Да се врати клубот помеѓу најдобрите четири ќе биде предизвик. Премиер лигата е многу тешка, ќе се обидеме да дадеме сѐ од себе на секој натпревари, а исто и да бидеме добро во Конференциската лига“, додаде италијанскиот стратег.
