Ова не е типично азиско јадење, напротив, многу личи на европско.
Месото може да се подготви на милион начини, особено кога сами бирате дали сакате свинско, говедско, пилешко, мисиркино, зајачко... а секогаш е добар предлог за ручек. Овој пат рецепт земаме од далечната Јужна Кореја (а кој би знаел, можеби се прави и во Северна Кореја), според кој можете да употребите месо по ваша желба, кое се прелива со јајца и павлака, па се пече.
Не само што е вкусно, туку и брзо се подготвува.
Потребни состојки:
- 500-600 гр месо (по желба)
- 2 јајца
- 150 мл павлака за готвење
- 1 лажичка италијански зачин
- 1 лажичка оригано
- 1 лажичка кари
- 1 домат
- 1 нишка магдонос
- масло
- сол
- бибер
Подготовка:
Месото исечкајте го на коцки, посолете и побиберете го. Убаво измешајте и наредете го во огноотпорен сад или некоја тепсија. Во сад изматете ги јајцата, па сипете ја павлаката за готвење, зачинете со италијански зачин, оригано и кари, измешајте убаво, па смесата прелијте ја преку месото. Сипете и малку масло над сето тоа, па наредете домат исечкан на кругови. Печете во загреана рерна на 200°C околу 20 минути. Откако ќе биде готово и ќе го извадите, јадењете посипете го со сечкан магдонос.
