Велеа дека нема опуштање и дека ќе се оди на победа, но од тоа не видовме ништо. Аутсајдерот Словачка забележа убедлива победа среде Скопје и заедно со нашите репрезентативци обезбеди пласман во мундијалските квалификации.
Македонската кошаркарска репрезентација со една нога имаше обезбедено пласман во квалификации, а за да испаднеше требаше да загуби со 20 поени разлика. За малку тоа и ќе се случеше.
Откако на полувреме Словаците заминаа со +6, во третата четвртина направија разлика од 15 поени, за во последниот дел едно време да поведат и со 21 поен разлика.
За среќа во завршницата нашите кошаркари го намалија водството и се изборија за подостоен пораз од 72:88.
Најдобар на паркетот беше Владимир Броѕианскиј кој запиша дабл-дабл со 17 поени и 10 скокови, додека најефикасен беше Михаел Фусек со 23 поени. Во нашиот табор најмногу поени, 17, постигна Кристијан Николов, 16 запиша Адем Мекиќ, 15 Бојан Крстевски, а 14 Џејкоб Вајли.
Со ваквиот расплет Македонија и Словачка патуваат во квалификациите, додека Швајцарија извиси. Сите три репрезентации завршија со идентичен скор, па решаваше кош-разликата.
Конечна табела:
- Македонија 2-2 270:263
- Словачка 2-2 259:262
- Швајцарија 2-2 249:253
Квалификациите ќе почнат во ноември.
