Кристијан Ериксен (30) наскоро ќе потпише за Манчестер Јунајтед, пренесува Фабрицио Романо.
Данскиот напаѓач се согласи на соработка на три години. Тој ќе пристигне во Јунајтед откако ќе му истече договорот со Брентфорд. Ериксен оваа недела ќе стане играч на Јунајтед. Клучен човек во целата операција беше новиот менаџер на клубот Ерик тен Хаг, кој инсистираше да го доведе Ериксен.
Ериксен на почетокот на годината потпиша шестмесечен договор со Брентфорд. Во тој клуб се врати во форма по долга пауза. Да потсетиме, минатата година тој доживеа срцев удар на Европското првенство. Откако му беше вграден дефибрилатор, тој автоматски веќе не можеше да биде член на италијанскиот шампион, бидејќи Серија А не дозволува играчи опремени со било каков уред за регулирање на срцето да играат во лигата.
На 12 јуни минатата година, во 42. минута од натпреварот меѓу Данска и Финска на Еврото, кој се играше на Паркен во Копенхаген, Ериксен падна на земја и остана безживотно да лежи. Екипата на итната помош брзо стигна до него и ја започна процедурата за реанимација, по што тој на носилки беше изнесен од теренот, а натпреварот беше прекинат.
Ериксен во текот кариерата играл за Ајакс, Тотенхем, Интер и Брентфорд, а сега на 30-годишна возраст го направи трансферот на кариерата. За данската репрезентација одигра 115 натпревари и постигна 38 голови.