Славниот фудбалер Кристијано Роналдо во една прилика изјави дека одбива да му купи смартфон на неговиот 11-годишен син за да не стане зависен од телефон, како што е случај со многу негови врсници.
Еден од најдобрите фудбалери во светот има строги правила на воспитување и одбива да му купи смартфон на синот.
„Еднаш ми побара да му купам iPhone за да може да ми се јави, но му реков дека не може. Ако сака да ми се јави, тоа нека го направи преку баба му. Сакам да му дадам до знаење дека не може да добие сè што сака. Образованието е најдобрата работа што можам да му ја подарам“, изјави фудбалерот.
Роналдо и претходно зборуваше за влијанието на технологијата, истакнувајќи дека новите генерации се чекор пред своите години.
„Технологијата дефинитивно е од голема помош. Ми помогна мене и на целиот свет, но мислам дека тоа треба да го искористиме, а не да станеме опседнати со тоа“, изјави тогаш Роналдо.
Неговиот најстар син во јуни ќе наполни 12 години и веќе оди по чекорите на татко си. Моментално тренира фудбал во академијата на Манчестер Јунајтед, додека пред тоа тренираше во школото за млади на Јувентус.
