Морничава вест доаѓа од средноамериканската држава Костарика, каде крокодил уби фудбалер.
Костариканскиот фудбалер Хесус Алберто Лопес Ортис почина во својата татковина откако беше убиен од крокодил. Станува збор за фудбалер на нисколигашот Депортиво Рио Кањас, кој пливал во реката Кањас, токму онаа по која е именуван клубот во кој настапува, а во таа прилика бил нападнат од крокодил и немал шанса да се одбрани.
За жал, луѓето кои не биле далеку од местото на немилиот настан не можеле да го одбранат ниту да го сопрат крокодилот, кој потоа продолжил да го влече телото на фудбалерот низ вода, се разбира со намера да го изеде. На крајот полицијата се појавила, го застрелала крокодилот, па го извлекла телото пред да биде целосно уништено, што е мала утеха во неверојатната трагедија што го снајде семејството Лопес.
„Драги пријатели, шокирани сме да ве информираме дека почина нашиот играч Хесус Алберто Лопес Ортис, познат како Чучо. Почивај во мир Чучо“, објави неговиот клуб Депортиво Рио Кањас на социјалните мрежи, додека пораките со сочувство стигнуваат до неговото семејство. Фудбалерот зад себе ги остави сопругата и детето.
ПРЕДУПРЕДУВАЊЕ: Видеото на кое се гледа како крокодилот го држи телото на фудбалерот во вилиците е вознемирувачко и однапред ве предупредуваме дека не е за оние со слаб стомак.
