Кошаркарот на Лос Анџелес Лејкерс, Леброн Џејмс, не сака да ги повикува другите луѓе да се вакцинираат против коронавирусот, иако неговото семејство и тој се одлучија за да примат вакцина.
Вакцинирањето на играчите од НБА е сѐ почеста тема, бидејќи се ближи почетокот на сезоната во најсилната кошаркарска лига во светот. Според информациите, досега 90% од играчите ја примиле вакцината, но недостасуваат некои од големите ѕвезди како Кајри Ирвинг и Бредли Бил.
„Можам да зборувам само за себе. Секој има право да го прави она што мисли дека е исправно за него и за неговото семејство. Бев скептичен, но по истражувањата сфатив дека е најдобро за мене и за мојата фамилија да ја примиме вакцината“, вели Леброн.
Веројатно највлијателниот играч во НБА, сепак, не сака да го искористи својот статус и да ги повика другите да го следат неговиот пример.
„Тука станува збор за тело на поединец. Не се работи за политика, расизам или полициска бруталност. Се работи за благосостојбата на луѓето и мислам дека не треба да се мешам. Знам што направив и што направија моите пријатели, но не сакам да повикувам никого да го стори истото“, рече НБА ѕвездата.
Предсезоната во НБА започнува на 3 октомври, а лигашките натпревари ќе започнат на 20-ти истиот месец.