Шансите жените кои користат лекови против болки во текот на бременоста да развијат компликации се за 50 отсто поголеми од оние кои не користат, покажа студијата.
Истражувачите од Универзитетот во Абердин откриле дека кај жените кои користеле лекови против болки како парацетамол и ибупрофен, имало повеќе случаи на предвремено породување, неонатална смрт, физичко оштетување на фетусот и мртвородени деца.
До 80 проценти од трудниците пијат лекови против болки
Околу 30 до 80 проценти од жените ширум светот пијат лекови против болки за да ги ублажат симптомите што може да се појават за време на бременоста, како што се грип, треска или ревматски состојби.
Во период од 30 години, биле следени бременостите на повеќе од 151.000 жени, а истражувачите ги анализирале медицинските податоци на оние кои пиеле пет вообичаени лекови против болки - парацетамол, ибупрофен, аспирин, диклофенак и напроксен.
Податоците покажаа дека бројот на жени кои пиеле лекови против болки за време на бременоста се удвоил помеѓу 2008 и 2015 година.
Иако регулаторите велат дека парацетамолот е безбеден за бремени жени, тие предупредија дека нестероидните антиинфламаторни лекови (NSAR) како што се ибупрофен и аспирин не треба да се земаат по 30-тата недела од бременоста.
Научничката Аикатерини Зафеири од Универзитетот во Абердин рече дека идните мајки секогаш треба да бараат лекарски совет пред да земат лекови без рецепт.
„Со оглед на она што го откривме во истражувањето, леснотијата на пристап до лекови без рецепт, во комбинација со мноштво информации и дезинформации на интернет, е причина за загриженост“, рече Зафеири.
„Ова особено важи за одлуките за земање лекови за време на бременоста без совет од лекар“, додаде таа.
„Треба да се предупреди дека земањето парацетамол во комбинација со NSAR е поврзано со поголем ризик од компликации, така што бремените жени секогаш треба да бараат совет од лекар или акушерка пред да земаат лекови без рецепт“, тврди таа.
Сметаме дека е исклучително важно што повеќе стручни совети им се достапни на трудниците“, заклучи таа.
