По типично англиски дождливо време „Лисиците“ со 4:1 го преслушаа Лидс и се вратија на второто место на табелата зад лидерот Ливерпул.
Одличен натпревар синоќа одиграа Лидс и Лестер кои го затворија 7. коло во Премиер лигата. Уште на стартот домашните промашија колосална шанса кога Патрик Бамфорд од петерецот со глава биеше само во Каспер Шмајхел.
Се играше 2. минута, а казната веќе стигна: додека гледачите покрај малите екрани ја гледаа повторената снимка од промашувањето на Бамфорд, Шмајлел со дегажман ги прати своите во контра која резултираше со одлична асистенција од Џејми Варди за Харви Барнс кој донесе водство.
Во 21. минута веќе Лестер поведе со 0:2. Варди биеше со глава, голманот Илан Меслие одбрани, а на одбиената топка налета Јури Тилеманс кој ја затресе празната мрежа.
Домашните се вратија во игра само три минути откако почна вториот дел. Стјуарт Далас нафрли во гостинскиот шестнаесетник, сите играчи ја промашија топката и таа на изненадување на Шмајхел заврши во мрежата.
На 1:3 во 76. минута зголеми Варди откако Џенгиз Ундер одлично го проигра, а конечниот резултат го постави Тилеманс од пенал во судиското надополнување откако Полјакот Матеуш Клих го фаулираше Џејмс Медисон на работ на шестнаесетникот.
Во меѓувреме, во 81. минута во игра влезе и македонскиот репрезентативец Езџан Алиоски кој имаше еден блокиран удар.
Со новата победа Лестер има 15 бодови, само еден помалку од лидерот Ливерпул, додека Лидс е 12-ти со 10.