Англискиот премиерлигаш Лестер Сити го претстави новиот тренинг центар во кој ќе се пресели за Божик.
По две години изградба, овој објект вреден нешто помалку од 110 милиони евра е еден од најдобрите во цела Велика Британија.
Според извештаите на британските медиуми, има 21 полигон за обука што се простираат над поранешниот голф клуб „Парк Хил“, вклучително и 14 терени со целосна стандардна големина.
Зградите во срцето на комплексот го носат името на поранешниот сопственик на овој клуб и неговата компанија, па затоа централната административна зграда и зградата каде што се наоѓа медицинскиот персонал се викаат „Вичај Сривадданапраба“. Таму сега се сместени сите капацитети за фудбалерите и вработените, како и ресторан и простории за рекреација.
Доминантната купола е наречена „Кинг Пауер Сентр“, а во него има и терен со вештачка трева и простор за медиумска содржина. Лестер утре ќе се пресели во овој тренинг центар.
„Ова е ‘работна област’ и ќе ни биде од голема помош во подготовките за натпревари. Терените изгледаат неверојатно и многу ќе им помогнат на нашите играчи“, изјави тренерот на „Лисиците“, Брендан Роџерс.
Лестер го победи Тотенхем на домашен терен со 2:0 во последното коло, и во моментов се наоѓа на второто место на табелата со 27 бода, четири помалку од Ливерпул, кој е на првото место.