Синоќа со огромно мнозинство беше усвоена Декларација за осуда на воените напади кои го загрозуваат територијалниот интегритет и суверенитет на Украина, но внимание привлекоа трите гласа „против“ оваа Декларација.
Единствени кое не ја поддржаа Декларацијата се двајцата пратеници на Левица, како и уште еден неименуван пратеник од друга партија. Но, пратениците на Левица однапред најавија дека нема да ја поддржат, а рекоа дека причините за оваа нивна одлука ќе ги објаснат за време на собраниската седница. Тоа и го направија.
„Најголем дел од луѓето мислат дека војната е од вчера, односно тие 8 дена откако почна војната. Не е од сега, туку е од 2014 година, а имаме ситуација да 8 години луѓето во Донбас се нон-стоп гранатирани и бомбардирани. Имаме 14 илјади цивилни жртви, од кои според Обединетите нации 81% се од страната на Донбас“, го почна својот говор пратеникот Борислав Крмов, еден од тројцата кои гласаа против Декларацијата.
„Клучен интерес на Македонија, како мала држава, е во вакви конфликти на големи сили да задржи неутралност. Ситуацијата е многу јасна: ако ние за тие цивили кои гинеле 8 години сме немале реакција, немаме сега морално право да донесуваме Декларација за жртвите кои сега се случуваат во војна. Поради горенаведеното, оваа Декларација е еднострана, го немаме моментот од 2014 година, од насилното рушење на власта во Украина, немаме 8 години убивање на цивили, го нема нивното константно кршење на права во Источна Украина. Пример е дека еден ден беше забранет рускиот јазик, беа подложни на асимилација и на крај, улогата на НАТО како главен провокатор и воен хушкач во оваа ситуација. Токму заради таа едностраност, ние како партија Левица нема да ја поддржиме оваа декларација“. заврши Крмов.
