Компанијата LG во својата понуда сега има и телевизор кој е лесно пренослив.
Станува збор за необичен и интересен уред именуван како StanbyME, кој преставува 27-инчен LCD телевизор со резолуција од 1.080 пиксели кој е спакуван во голем куфер заедно со вградена батерија и 20W звучници.
Идејата е телевизорот да биде лесно преносливо забавно решение кога сте на пикник, семеен одмор или едноставно се одморате во својот двор. Можностите се прилично големи, но треба да се има предвид фактот што батеријата на ТВ уредот трае 3 часа.
Екранот може да се прилагоди на различни начини, да се навалува, ротира и врти, па дури може и да се постави во положба на маса бидејќи има некои игрици оптимизирани за уреди со екран на допир. Телевизорот го користи софтверот webOS на LG, па нуди и различни апликации за стриминг. Се контролира преку екран на допир или далечински управувач, а овозможени се и гласовни команди.
StanbyME Go поддржува AirPlay и пресликување на екранот и е компатибилен со уреди што користат оперативни системи Android и iOS. Исто така, 27-инчниот пренослив телевизор поддржува Bluetooth и Wi-Fi конекција, како и Dolby Vision и виртуелизирана Dolby Atmos технологија.
Податоците за максималната осветленост не се специфицирани, но телевизорот има посебен режим за надворешна употреба, што ја прави сликата видлива и покрај сончевата светлина. Покрај тоа, доаѓа со 8 амбиентални теми, вклучувајќи оган во камин и звук на бранови на плажа.