Англискиот фудбалски гигант Ливерпул ќе му ја исполни желбата на легендарниот тренер Свен-Јеран Ериксон, кој умира.
Во јануари Ериксон (75) ја шокираше јавноста со објавата дека боледува од рак и дека му останува уште една година живот.
За време на неговата тренерска кариера, која траеше од 1977 до 2019 година, тој успешно ги водеше Рома, Бенфика и Лацио со кои освои осум трофеи, вклучувајќи ја и шампионската титула со Лацио по 26 години чекање. Но, неговата најголема желба остана неостварена - да биде тренер на Ливерпул.
Неодамна тренерот на Ливерпул, Јирген Клоп го повика да дојде на стадионот, да помине цел ден со првиот тим и да го води тренингот, но челниците на Ливерпул решија да направат навистина голем потег.
Ериксон е повикан да води тим од легенди на Ливерпул против Ајакс на „Енфилд“ на 23 март.
На Ериксон во работата ќе му помагаат легендите на Ливерпул, Иан Раш, Џон Барнс и Џон Олдриџ, а во составот на „Црвените“ ќе бидат дел од играчите кои ја освоија Лигата на шампионите во 2005 година, како Јержи Дудек и Џибрил Сисе.
Така, во последните денови од животот на Ериксон ќе му се исполни желбата да седне на клупата на Ливерпул, а овој потег на клубот наиде на воодушевување кај нивните навивачи.
