Барселона потврди дека на Филипе Кутињо ќе му треба операција на коленото по повредата против Еибар, а повеќемесечното отсуство не е само лоша вест за Каталонците, туку и за Ливерпул.
Имено, Бразилецот стана еден од најскапите играчи на сите времиња во јануари 2018 година кога потпиша за Барселона во трансфер вреден 142 милиони фунти.
На Ливерпул веднаш им беа исплатени 106 милиони фунти, а остатокот е обезбеден во форма на разни бонуси. Една од бонусните клаузули предвидуваше дека Барса ќе плати дополнителни 18 милиони фунти (20 милиони евра) откако Кутињо ќе одигра 100 средби од натпреварувачки карактер и беше скоро сигурно дека тоа ќе се случи оваа сезона.
Неговиот натпревар со Еибар беше 90-ти во дресот на Барса, што значи дека Бразилецот ќе треба да игра само уште десет натпревари за да може Ливерпул да собере значителна сума пари од бонуси.
Сепак, повредата на менискусот е посериозна и се предвидува дека тој ќе паузира помеѓу четири и пет месеци, а скоро е сигурно дека тој нема да ги запише десетте натпревари на кои се надеваа во Ливерпул до крајот на сезоната.
Кутињо минатата сезона играше на позајмица за германскиот Баерн, со кого ја освои Лигата на шампионите, но ни тие на крај не сакаа да го откупат неговиот договор. Играше и за Интер од кој се пресели во Ливерпул.
Оваа сезона, 28-годишниот играч одигра 14 натпревари за Барселона на кои постигна три гола и запиша две асистенции.