Трката за Хари Кејн ја достигна својата кулминација откако во приказната се приклучи и ПСЖ, додека Баерн повеќе не смета на Садио Мане, на кого му било соопштено дека може да си бара нов клуб, пренесува новинарот на германски Kicker, Георг Холцнер.
Сенегалецот, кој одигра 38 натпревари минатата сезона, и неговите менаџери добија порака од Баерн и сега се во потрага по нов клуб.
Тоа наводно било направено за да може Баерн да заработи повеќе за да испрати поголема понуда до Тотенхем за Кејн. Со заминувањето на Мане би се зголемил и буџетот за плати на баварците, со оглед на високата плата што ја добива Сенегалецот.
Договорот на Мане е до летото 2025 година и Баерн се надева дека клубовите од Саудиска Арабија се подготвени да инвестираат во поранешниот напаѓач на Ливерпул.
Претходно беше објавено дека за Мане се заинтересирани Ал Наср и Ал Етифак, чиј нов тренер е легендата на Ливерпул, Стивен Џерард, а каде настапува и нашиот Дарко Велковски.
Сепак, во приказната се вклучи и Пари Сен-Жермен, чии челници се подготвени да му платат на Тотенхем 100 милиони евра обештетување за капитенот на лондонскиот клуб, пренесува француски RMC.
Тотенхем одби две понуди од Баерн од 70 и 80 милиони евра за Кејн, бидејќи лондонскиот клуб бара 100 милиони евра.
Французите наведуваат дека претставници на ПСЖ веќе разговарале со Кејн и челниците на Тотенхем, а за следната недела е закажан нов состанок на сите страни.
