Бостон Селтикс се потврди како најдобар тим во НБА лигата со тесната победа од 110:107 во дербито на Истокот, на гостувањето кај Филаделфија 76ерс.
Џејсон Тејтум постигна тројка за победа на 1,3 секунди пред крајот, а потоа Џоел Ембиид ја фрли топката преку теренот и погоди за продолжение, но се покажа дека доцнеше за дел од секундата и спектакуларниот кош беше поништен.
Ембид постигна 41 поен со 12 скока, пет асистенции и три блокади, но кај домашниот тим двоцифрени беа само Џејмс Харден (21) и Тобијас Харис (19). Селтикси многу подобро ги распределија офанзивните задачи, а Тејтум ги предводеше со 26 поени. Бостон подобри на 44-17, а Филаделфија падна на 39-20.
Во Западната конференција се одигра и дербито во кое второпласираниот Мемфис Гризлис го совлада водечкиот Денвер Нагетс со 112:94, ограничувајќи го Никола Јокиќ на еден од најслабите настапи сезонава - 15 поени, 12 скока, три асистенции и три изгубени топки. Домаќините ги предводеше Џа Морант со 23 поени.
Детроит - Торонто 91:95
Орландо - Индијана 108:121
Шарлот - Мајами 108:103
Њујорк - Њу Орлеанс 128:106
Мемфис - Денвер 112:94
Филаделфија - Бостон 107:110
Јута - Сан Антонио 118:102
