Македонскиот младински фудбалски репрезентативец Лука Станковски ги смени клупските бои и премина од редовите на скопски Работнички во турскиот прволигаш Газиантеп.
Станковски (19), денеска потпиша договор на 4 и пол години со можност за продолжување на соработката за уште една година, во присуството на раководство на Газиантеп, предводен од клупскиот претседател Џевдет Ак'нал.
„Имаше неколку понуди за Лука Станковски, но раководството на Газиантеп беше најупорно, понуди одлични услови и за клубот и за самиот фудбалер, а заеднички донесовме одлука дека тоа е вистинскиот клуб за Лука да продолжи да напредува и да се развива. Му посакуваме многу среќа, да се наметне со своите игри во Газиантеп и да го следи примерот на неговите поранешни соиграчи Елиф Елмас и Милан Ристоски, кои сега се стандардни членови на сениорската репрезентација на Македонија. Со својот квалитет Лука го заслужува токму тоа и веруваме дека многу брзо ќе го оствари“, изјави претседателот на Работнички, Драган Поповски, изразувајќи големо задоволство од реализираниот трансфер.
„Лука Станковски беше фудбалер кој внимателно го следевме. Тој има голем потенцијал за во иднина, кој е добро познат и во својата земја и во Европа. Среќни сме што додаваме толку важен млад талент во нашиот клуб. За овој трансфер нашите пријатели менаџери Фикрет Килеџи, Ерхан Озмен и нашиот извршен директор Ерхан Јуксек отидоа во Македонија и успеаја да го убедат и семејството и клубот на играчот. Мислам дека остваривме многу важен трансфер, кој посакувам да биде корисен за сите нас. Уште еднаш му посакуваме добредојде на Лука и му посакуваме успех“, рече претседателот на Газиантеп, Џевдет Ак'нал.
Работнички не ја откри сумата која ќе ја добие од турскиот клуб како обесштетување, но реномираниот вели дека се работи за 600 илјади евра.
Газиантеп е на средина на табелата во турската Суперлига со 28 бодови по одиграни 19 кола.
