Потрагата по двегодишната Данка Илиќ, кое исчезна пред точно седум дена во Бањско поле во Бор, Србија, уште трае.
Полицијата постојано ја чешла секоја педа од местото каде што последен пат било видено девојчето, а еден сегмент од истрагата е фокусиран на видеото снимено од српски државјанин во Виена, на кое се гледа девојче кое наликува на исчезнатата Данка. Австриската полиција рече дека „многу е веројатно“ дека девојчето на снимката е Данка и објави фотографии од жените кои се во видеото.
Ивана Илиќ, мајката на исчезнатото девојче, првпат по исчезнувањето на Данка даде изјава за порталот Nova.rs. Ивана наведува дека таа и нејзиниот сопруг се заедно, дека секојдневно се борат нивното дете што побрзо да се врати дома, но и дека за неа со денови се објавуваат „бројни небулози“.
„Се држиме колку што можеме, само за да се најде Данка што поскоро, чекаме да заврши сето ова, се надеваме на најдобро, а потоа јас и мојот сопруг јавно ќе се огласиме и ќе одговориме сите навреди, прозивки, небулози. Затоа не се огласуваме. Ме болат сите овие шпекулации, обвинувања до мене и мојот сопруг“, вели Ивана.
„Телефонот ми беше на вештачење, само тоа ќе кажам. Да беше така, немаше да бидам мајка која си го бара детето, статусот ќе ми беше друг. Само Данка да се врати жива и здрава. а потоа ќе зборуваме за сè “, вели Ивана за Nova.rs.
На прашањето дали го гледала видеото од Виена, таа вели дека го гледала.
„Го гледав видеото, но поради текот на истрагата не смеам да коментирам. Секоја чест за полицијата, луѓето не спијат, бараат деноноќно. Се надевам дека што е можно побрзо ќе си го гушнам детето“, вели мајката на исчезнатата Данка.
„Се надевам дека Данка е добро, не сакам ни да размислувам за друга опција“, заклучува Ивана.