Во досегашната историја вечерашниот дуел помеѓу Македонија и Италија ќе биде само четврти. Скорот засега е израмнет: по една победа за двете репрезентации и едно реми.
Пресметките на Македонија и Италија започнаа кога двете репрезентации беа извлечени во иста група во квалификациите за Мундијалот 2018 во Русија.
Првиот дуел се одигра во Скопје на 9 октомври 2016 година, а Италија славеше со 3:2 во натпревар со два пресврта и победнички гол во судиското надополнување. „Аѕурите“ тогаш поведоа преку Андреа Белоти во 24. минута, а Македонија за само три минути во 57. и 59. минута со головите на Илија Несторовски и Ферхан Хасани направи комплетен пресврт. Следуваше нов пресврт, овој пат во режија на Италија и тоа со двата гола на денешниот капитен Чиро Имобиле во 75-тата и 2. минута од надополнувањето.
Од тој натпревар денес во составот на Македонија се само Езѓан Алиоски и Илија Несторовски, а кај Италија се Чиро Имобиле, Матео Дармјан и Џиџи Донарума, но последниве двајца тогаш не заиграа.
Втората пресметка беше во Торино на 6 октомври 2017 година во рамките на истите квалификации. Италија поведе со голот на Џорџо Кјелини во 40. минута, а Македонија се избори за реми благодарение на погодокот на Александар Трајковски во 77. минута.
Од тој натпревар денес во комбинација за Македонија се Столе Димитриевски, Висар Муслиу, Езѓан Алиоски, Дарко Велковски, Енис Барди, Илија Несторовски, Ѓоко Зајков, Александар Трајковски, како и тогаш резервите Љупчо Дориев и Дамјан Шишковски. Кај „Аѕурите“ од тој дуел денес во Скопје се Матео Дармјан, Чиро Имобиле и Брајан Кристанте, како и Леонардо Спинацола, Џиџи Донарума и Николò Барела кои тогаш не добија шанса од клупата.
На овие два натпревара на клупата на Мкаедонија седеше Игор Ангеловски, додека на италијанската беше Џан Пјеро Вентура.
Последната пресметка се одигра на 24 март 2022 година во Палермо и беше полуфинален бараж натпревар за пласман на Мундијалот 2022 во Катар. Македонија оствари шокантна победа од 1:0 со гол на Александар Трајковски во 92. минута, односно во судиското надополнување.
Кај „Аѕутите“ од тој за нив кобен дуел денес во игра се Џиџи Донарума, Џанлука Манчини, Алесандро Бастони, Николò Барела, Чиро Имобиле и Сандро Тонали, како и Брајан Кристанте, Матео Песина и Матео Политано од оние што останаа на клупата. Тогаш Италија ја водеше Роберто Манчини.
Во составот на Македонија денес се Столе Димитриевски, Висар Муслиу, Езѓан Алиоски, Александар Трајковски, Енис Барди, Дарко Велковски, Милан Ристовски, Аријан Адеми, Стефан Ашковски и Бојан Миовски, како и Давид Бабунски, Никола Серафимов, Дориан Бабунски, Јани Атанасов и Дамјан Шишковски кои тогаш беа на клупата. Македонија тогаш ја водеше истиот селектор како и денес, Благоја Милевски.
Скор:
Победи Италија: 1
Нерешени: 1
Победи Македонија: 1
Гол-разлика: 4:4
Листа на стрелци:
2 - Александар Трајковски
2 - Чиро Имобиле
1 - Андреа Белоти
1 - Илија Несторовски
1 - Ферхан Хасани
1 - Џорџо Кјелини
Најмногу одиграни меѓусебни натпревари:
3 - Езѓан Алиоски
3 - Чиро Имобиле
