Македонската фудбалска репрезентација од денеска е на 68. место на ранг-листата на ФИФА со пад од три места. Промената се должи на азиските и афричките репрезентации кои имаа континентални натпреварувања.
Поради Азискиот куп и Африканскиот куп на нации ранг-листата на ФИФА доживеа доста промени, но не и во топ 10. Таму останува сѐ по старо со Аргентина на врвот.
Македонија, која е неактивна од ноември, не загуби бодови, но падна три места од 65-тото на 68. место. Падот се должи поради напредокот на ДР Конго, Зелен 'Рт и Узбекистан, кои претходно беа зад нас.
Најголем скок забележа Ангола од 24 места (сега 93.), потоа Катар со 21 (сега 37.) и Јордан од 17 (70.). Новите континентални шампиони Катар и Брегот на Слоновата Коска сега се на 37. односно 39. место.
Сите противници на Македонија во новата сезона од Лигата на нации, која почнува во септември, се послабо рангирани и тоа Ерменија 94. место, Фарски Острови 135-то и Латвија 136. место.
Шанса за Мкаедонија да освои бодови и да скокне некое место ќе има кон крајот на наредниот месец кога во Анталија ќе одигра две пријателски против Молдавија и Црна Гора.