Дивјачкиот испад по мечот во двојки во кој загуби од Лојд Гласпул и Хари Хелиеваара со Марсело Мело стигна до „наплата“ за Александер Зверев.
АТП го казни третиот тенисер во светот со максимална казна, односно одземање на парите заработени на турнирот во Акапулко (30.000 долари) со парична казна од 40.000 долари.
Ќе ги загуби и освоените бодови на турнирот на кој ја одбрани титулата. Eurosport наведува дека ова е максималната казна што АТП може да му ја додели на Зверев, кој во дивјачки испад врз судијата Алесандро Џермани го скрши рекетот и упати низа пцовки кон него. Поради сето ова тој беше исфрлен од турнирот на кој настапуваше во поединечна конкуренција.
Максималната казна за вербално малтретирање што АТП може да ја одреди е 20.000 долари, а истата е и највисока за неспортско однесување. Зверев ги доби и двете, а АТП нагласи дека подоцна ќе го разгледа инцидентот.
Германскиот тенисер се извини на судијата и на јавноста по инцидентот.