Моментално најдобриот француски фудбалер изјави дека доколку еден ден неговиот син сака да игра за репрезентацијата на Камерун, тој нема да му прави проблеми.
Ѕвездата на ПСЖ е половина Камерунец со оглед на тоа што неговиот татко имигрирал во Франција од оваа африканска земја. Изминатите неколку дена Килјан Мбапе беше на одмор токму во Камерун, а го посети и родното село на неговиот татко. Локалните новинари му поставија хипотетичко прашање - „ако твојот син еден ден стане славен фудбалер, за која репрезентација би играл?“
„Тоа е многу лесно прашање. Не е исто како да зборувате за играње за клуб. Играњето во дресот со националните бои мора да доаѓа од срце. Никогаш не сум ги криел камерунските корени, но роден сум во Франција, целиот живот го минав таму, таа земја ми е поблиска до срцето и затоа одбрав да играм за неа“, изјави Мбапе, пред да додаде:
„Е сега, можеби мојот син ќе се роди во Камерун, или ако израсне во таа земја и ја засака, се приврзе за неа, па тогаш е многу веројатно и да одбере да не игра за Франција. Доколку тоа навистина биде така, апсолутно ќе ја почитувам неговата одлука и никогаш не би се мешал. Тоа е лична работа која секој човек мора да ја реши во себе“.
Инаку, Килјан преку својата фондација им помага на сиромашните заедници во Камерун, каде во неколку наврати реновираше училишпта и финансираше разни проекти.
24-годишниот Мбапе засега нема деца. Инаку, неговите деца покрај за Франција и Камерун би можеле да играат и за Алжир, бидејќи неговата мајка е од таму.
