Јужноамериканските квалификации за Мундијалот 2026 беа отворени ноќеска со натпреварите од 1. коло, а главниот натпревар беше меѓу светскиот шампион Аргентина и Еквадор, кој го реши Лионел Меси.
Иако со својата Аргентина го освои последното Светско првенство во Катар и си го исполни долгогодишниот сон, Меси не сака да застане тука. Напротив, започна нов циклус мундијалски квалификации и тоа го направи на вистински начин.
Аргентина се мачеше против Еквадор, но забележа тесна победа од 1:0 на преполниот „Монументал“ со 86 илјади гледачи.
Се играше 78. минута кога Меси изведе фантастичен слободен удар и погоди за водство, со што донесе победа за актуелниот светски шампион.
Ова беше гол број 104 за Меси, а 11-ти од слободен удар во неговиот настап број 176 за Аргентина. Со овој гол Меси постави и неколку рекорди. Прво, се израмни со Луис Суарес на водечкото место на листата на најдобри стрелци во историјата на јужноамериканските мундијалски квалификации - двајцата имаат постигнато по 29 голови.
Потоа, се израмни со Роман Рикелме на првото место меѓу најдобрите изведувачи на слободни удари во историјата на јужноамериканските мундијалски квалификации. Се израмни и со Хамес Родригес како единствен со 4 постигнати голови за победи од 1:0 во мундијалските квалификации. И за крај, со неговиот гол Аргентина ја оствари својата најдобра серија во историјата со 22 натпревара без пораз во квалификациите за Светско првенство.
Во останатите натпревари од јужноамериканските квалификации играни ноќеска, Парагвај и Перу ремизираа без голови иако Перуанците од 45. минута беа со играч помалку по вториот жолт картон на Луис Адвинкула, додека Колумбија ја совлада Венецуела во минимални 1:0 благодарение на голот на Рафаел Боре во 46. минута.
Вечерва по полноќ играат Уругвај - Чиле (1:00 ч.) и Бразил - Боливија (2:45 ч.)