Американската компанија Meta објави дека корисниците на нејзините услуги во Европската Унија ќе можат да ги одвојат своите профили на Facebook и Instagram, како и да ја прекинат врската со другите апликации на Meta.
Овие промени значат дека корисниците од ЕУ ќе можат да ги користат апликациите на Meta кои нема да споделуваат кориснички информации меѓу себе, пишува технолошкиот портал The Verge.
„Одлуката на компанијата Meta е донесена во светло на фактот дека новиот Закон за дигитални пазари (DMA) ќе стапи на сила во Европската Унија во март, а корисниците во ЕУ ќе добијат информации за промените во наредните недели“ се вели во соопштението.
Меѓу другото, корисниците ќе можат да го користат Messenger како самостојна услуга без профил на Facebook и да ги одвојат своите профили на Facebook и Instagram доколку претходно ги поврзале.
Услугите на платформите Facebook Marketplace и Facebook Gaming ќе бидат достапни дури и ако корисникот не е поврзан со неговиот главен профил на Facebook.
Најавата на Meta доаѓа откако Google на почетокот на овој месец објави на сличен начин дека ќе им овозможи на корисниците да престанат да споделуваат податоци помеѓу услугите како Google Search, YouTube, Google Maps и веб-прелистувачот Chrome.
