Откако го објави списокот со повикани играчи за претстојните дуели со Италија и Малта, селекторот Благоја Милевски денеска одржа прес-конференција.
На истата веднаш објави за три откажувања: Радески, Чурлинов и Етеми, што значи дека списокот се намалу на 26 играчи.
„Тројца од списокот нема да бидат со нас, отпаѓа Марјан Радески, а исто така и Дарко Чурлинов нема да биде во комбинација за настап, како и Ваљон Етеми, кој ја влече истата повреда од минатиот месец. Димитар Митровски и Ахмед Иљазовски добија дебитантски повик во националниот тим и ќе се обидат да ја зголемат конкуренцијата“.
Што се однесува на тоа дека на списокот има и играчи кои се без клуб, како Ашковски и Трајковски, Милевски рече:
„Александар Трајковски е во моментов без клуб, но тој е професионалец кого добро го познавам и изрази желба да биде дел од тимот. Физички е подготвен, но за сите играчи ќе направиме проценка околу нивната подготвеност и ќе одлучиме кој колкава минутажа ќе добие на двата натпревара“.
Македонија во септемвриските квалификации влегува по двете јунски разочарувања, поразот од Украина среде Скопје со 3:2 откако водевме 2:0, и понижувањето во Манчестер со 7:0 од Англија.
„Сакаме да покажеме дека Македонија е конкурентна и покрај проблемите со кои се соочуваме. Ќе го дадеме максимумот, момците ќе бидат подготвени за предизвикот и мислам дека атмосферата во нациналниот тим ќе биде добра и позитивна. Без разлика на резултатите, Македонија заслужува поддршка од трибините и се надевам дека стадионот ќе биде исполнет до последното место“.
„Македонија може да биде добра само ако функционира како тим и наша должност е сите да се ставиме во функција на тимот, само така може да се надеваме на успешни настапи. Факт е дека постојано, освен со Португалија, секогаш ни недостасувале витални играчи, но ростерот е тој, изборот е тој, тоа е реалноста. Не сме фудбалска велесила. Тоа што ни се случи со Англија е можеби и добро, за да се спуштиме на земја и да почнеме од доле, да градиме тимски дух и тим“, заврши селекторот.