Во период од 15 до 21 август регистрирани се вкупно 2.686 нови позитивни случаи на COVID-19 од 34 градови во земјава, со намалување од 22,7% во однос на претходната недела, покажуваат податоците од неделниот извештај на Институтот за јавно здравје.
Најголем број од регистрираните случаи се од Скопје, а највисока инциденца е регистрирана во Делчево, Кавадарци, Гевгелија, Пехчево, Охрид, Неготино, Берово и Кратово.
Согласно податоците од ИЈЗ, најзастапена е возрасната група на лица над 60 години. Во однос на претходната недела, регистрирано е намалување кај сите возрасни групи со најзабележително намалување од 36,3% во возрасната група 10-19 години.
Оздравени се 3.197 лица, или 14,6% помалку во споредба со претходната недела. Пријавени се 20 смртни случаи, најголем број од Охрид - 5.
Во текот на минатата недела се хоспитализирани 28 лица, а моментално во болниците се лекуваат вкупно 125 ковид-пациенти, 37,2% помалку во споредба со претходната седмица. Од нив 45 се на кислородна поддршка, а еден пациент е на инвазивна/неинвазивна механичка вентилација.
