По синоќешната победа над Баер Леверкузен во првиот полуфинален натпревар од Лига Европа, португалскиот стратег не штедеше зборови за младиот Италијанец, кој и беше стрелец на единствениот погодок.
Едоардо Бове има само 20-години, а за некој ден ќе полни 21. Роден е на 16 мај 2002 година во Рим. Од мал е во Рома минувајќи ги сите младински категории. Игра во средината, а најмногу му лежи улогата како треквартиста.
Синоќа во 63. минута се прошета низ половината на гостите од Леверкузен, го проигра Теми Ејбрахам чиј шут беше одбранет од Лукаш Храдецкиј, на одбиената топка налета Бове и биеше неодбранливо.
„Напорно тренира и напредува. Бове има голем талент и како играч и како личност. Тоа што стигна до тука е заслуга на неговата фамилија. Тој е едуциран, со академско образование. Тој е професионалец за пример, се чини како да е 30-годишен играч, а не толку младо момче. Минатата сезона играше по 5 минути, сезонава по 20, па по 30, а сега стана стартер. Напредуваше на емоционално ниво. Јас си ја одработив мојата работа, му помогнав да напредува. Лично не ја познавам неговата фамилија, но сигурно се од високо ниво штом вака го израснале“, рече Мурињо.
Бове студира економија и менаџмент на приватниот универзитет „ЛУИСС Гуидо Карли“ во Рим. Вели дека негова инспирација е клупската легенда Даниеле Де Роси.
Моменталната вредност според Transfermarkt му изнесува само 3 милиони евра, но тоа сигурно наскоро ќе се промени. Со „Волчицата“ има договор до јуни 2025 година. Сезонава одигра вкупно 27 натпревари и постигна 2 гола, од кои 18 натпревари во Серија А (1 гол), 8 во Лига Европа (1) и 1 во Копа Италија.