Тотенхем синоќа во неверојатен натпревар со 9 голови доживеа елиминација од ФА купот иако за 90 минути погоди четори пати во домашната мрежа.
На Жозе Мурињо не му се верува што се случи вчера во Ливерпул кога неговиот тим со 5:4 загуби од Евертон и отпадна од трката по куп трофејот.
Тотенхем поведе уште во 3. минута преку Дависон Санчес, но потоа од 36-тата до 43-тата Евертон постигна три гола преку Доминик Калверт-Левин, Ришарлисон и Гилфи Сигурдсон, а играчите на Мурињо правеа грешка до грешка.
„Уживав - и не уживав. Уживав како игравме со топката. Создававме шанси, бевме доста подвижни, дадовме голови. Покажавме карактер дека можеме да се бориме против неверојатни грешки. Но, напаѓачкиот фудбал носи победа само кога тимот нема да прави повеќе грешки отколку што создава шанси. Постигнавме четири гола и тоа не беше доволно“, вели Мурињо.
Неговиот тим намали на 3:2 во последните моменти од првиот дел со голот на Ерик Ламела, а по паузата израмни на 3:3 со вториот гол на Санчес. Ришарлисон се погрижи за ново водство на Евертон, за на крај Хари Кејн да израмни на 4:4.
Сепак, во продолженијата Бернард постигна гол за победа на тимот на Карло Анчелоти.
„Тешко ни е на сите. Имаме чувство дека навистина игравме добро со топка, бевме храбри, бевме подобриот тим при 1:0, а потоа за пет минути беше грешка, грешка, грешка, гол, гол, гол. Возвративме со борба, но направивме повеќе грешки. Беше како игра на мачка и глушец. Глувчето ги претставуваше нашите грешки, а мачката бевме ние како се обидуваме да надокнадиме за истите“
