Скопски МЗТ е првиот полуфиналист на јубилејното 30-то издание на македонскиот кошаркарски Куп „Благоја Георгиевски-Буштур“, откако попладнево во воведниот натпревар на завршниот турнир во СРЦ „Кале“ го совлада Кожув со 80:68 (49:33).
МЗТ до место во полуфиналето го предводеше тандемот Дамјан Стојановски и Дастин Вер со по 19 поени, додека Страхиња Мицовиќ постигна 16 поени. Вер всушност имаше дабл-дабл учинок бидејќи постигна и 11 асистенции.
Во тимот од Гевгелија најефикасен беше Мирон Гордон со 27 поени.
Клубот од скопски Аеродром по 25-ти пат во својата историја ќе игра полуфинале.
Во денешните преостанати три пресметки за место во полуфиналето се среќаваат Гостивар - Феникс 2010, Пелистер - Еуро Никел и бранителот на трофејот ТФТ Скопје против градскиот ривал Работнички. Токму победникот од последниот дуел ќе игра против МЗТ.