Селекторот на репрезентацијата на Велс, Роб Пејџ, им забрани на своите играчи да играат голф на Светското првенство во Катар кое започнува на 20 ноември и ќе трае до 18 декември.
„Да, голфот е забранет. Ние сме тука да си ја одработиме задачата.
Порано, Гарет, Кифер Мур и Арон Ремзи ќе ме прашаа што правиме утре попладне и дали имаме некакви состаноци. Им велев: ‘Не, нема состаноци, слободно одете играјте’“, рече Пејџ.
„Но, тоа е кога имате една недела за подготовки. Сега ќе немаме време. Имаме натпревар на секои четири дена. Нема попуштање.“
Да потсетиме, навивачите на Реал Мадрид, каде Бејл беше од 2013 до 2022 година, го критикуваа Бејл дека покажува повеќе ентузијазам за голф отколку за фудбалот. Пред три години тој наводно им рекол на соиграчите од мадридскиот клуб: „Имам уште три години договор и ако сакаат да се ослободат од мене, ќе треба да ми плаќаат 17 милиони по сезона. Ако не сакаат, ќе останам во клубот и ќе играм голф“.
Бејл летово го напушти Реал како слободен играч, потпишувајќи едногодишен договор со Лос Анџелес ФК од МЛС, за кој постигна три гола на 14 натпревари. Велс се пласираше на Светското првенство по 64 години. Тие ќе играат во групата Б со Англија, Иран и Соединетите Американски Држави.
