Жерард Пике на својот последен натпревар во кариерата синоќа на гости кај Осасуна како резерва го пцуеше главниот судија и заработи исклучување.
Барселона синоќа гостуваше во Памплона кај незгодната Осасуна, а на полувреме имаше негатива од 1:0 и играч помалку откако Роберт Левандовски во 31. минута доби втор жолт картон.
Откако се прости од публиката на „Камп Ноу“, за Пике овој натпревар требаше да биде последен во кариерата. Почна од клупата за резерви и не дочека да влезе во игра бидејќи на полувремето му пријде на судијата Хесус Хил Мансано и, како што пренесуваат шпанските медиуми, му го изнакажал сѐ она што изминатите години не можел да му го каже поради страв од суспензија.
Пике на Мансано му рекол дека со години наназад намерно ја оштетувал Барселона, а конкретно во синоќешниот натпревар Каталонецот се жалел на црвениот на Левандовски и голот на Осасуна, за што сметал дека секунди претходно имало прекршок над Маркос Алонсо.
Но, Пике своите критики не ги изнел на цивилизиран начин.
„Виде ли бе како го постигнаа голот од корнер? Ти си судија кој досега најмногу нѐ еб*ваше! Ова е еб*на срамота! Да ти се посерам на мајка ти еб*на!“, се зборовите кои главниот судија Мансано ги навел во извештајот дека Пике му ги кажал.
Пике и претходно имаше недоразбирања со Мансано и тоа последниот пат во април 2021 кога на крајот од натпреварот му пријде и го праша зошто судиското надополнување траело кратко, по што доби црвен.
Исто така, по дуелот против Жирона на 23 септември 2018, Лео Меси одби да се ракува со Мансано бидејќи сметашпе дека ја оштетил Барса.
Навивачите на Барса на социјалните медиуми масовно изразуваат поддршка за Пике бидејќи и самите сетаат дека Мансано навива за Реал Мадрид, а ги мрази Барселона и Атлетико. Доказ аз тоа, тврдат, може да се види и во статистиката.
Мансано веќе 10 години како суди во ла Лига, а на Барселона ѝ има доделено 9 црвени катони во 33 натпревари на кои ѝ судел, а на Атлетико 8 на 31. Од друга страна, на Реал му дал само 1 црвен во 29 натпревари.
Пике синоќа остана без можност да запише последни минути во дресот на Барселона, па остана на 616 настапи во кои освои 8 титули во ла Лига и 3 во Лигата на шампиони.
На меѓународна сцена во дресот на Шпанија ги освои Мундијалот 2010 и ЕУРО 2012, а запиша вкупно 102 настапа.
