Баварскиот великан експресно најде замена за тренерот Ханси Флик, кој најави заминување, и тоа во вонсерискиот предводник на Лајпциг.
Баерн потврди дека Јулиан Нагелсман од лето седнува на клупата на најтрофејниот германски клуб. Воедно, бидејќи младиот стратег сѐ уште е под договор со Лајпциг, Баерн ќе му искешира на овој клуб 25 милиони евра за да може од 1 јули да го има на својата клупа.
„Јулиан Нагелсман ја предводи новата генерација на тренери. И покрај младоста, тој има импресивна кариера. Убедени сме дека со него ќе направиме огромни успеси во наредните години“, рече претседателот на Баерн, Херберт Хајнер.
Нагелсман има само 33 години и веќе важи за еден од најдобрите тренери на светот. Неговата тренерска кариера почна во октомври 2015 кога имаше 28 години и тоа на чело на Хофенхајм, станувајќи и најмлад тренер во историјата на Бундеслигата. Од летото 2019 го презеде Лајпциг кого минатата сезона го донесе до полуфиналето од Лигата на шамшионите, а оваа ќе ја заврши ккао втор во Бундеслигата.
„Сакам да му се заблагодарам на Ханси Флик во името на Баерн. Го презеде нашиот тим во едно тешко време во 2019 и успеа да освои шест трофеи, а седмиот, се надеваме, наскоро. Тој секогаш ќе има посебно место во книгите за историјата на Баерн. Му посакуваме сѐ најдобро“, додаде Хајнер.
Ханси Флик, пак, на своја иницијатива го напушта Баерн и покрај огромните успеси кои ги направи со клубот. Германските медиуми велат дека причината за неговиот потег е тоа што токму Флик ќе седне на селекторското столче на репрезентацијата на Германија бидејќи Јоахим Лев си заминува по Европското првенство.