Најмалку 15 лица загинаа во тешка сообраќајна несреќа во канадската провинција Манитоба, соопшти Кралската канадска коњичка полиција (РЦМП).
До судирот дошло меѓу камион со полуприколка и автобус во кој имало претежно постари лица. Полицијата соопшти дека судирот се случил на Транс-Канада автопатот во близина на Карбери, два часа западно од Винипег.
Во неколку твитови, РЦМП Манитоба соопшти дека одговориле на „многу сериозен масовен судир“ и дека сите нивни ресурси, вклучително и главната крим-единица, биле распоредени на местото на настанот.
Во четвртокот во 11:43 часот по локално време на местото на настанот биле испратени служби за итни случаи, вклучително и авионска брза помош и 12 возила на брза помош. Повеќето постари лица во транспортното возило биле од Дофин, Манитоба и околните области.
Најмалку 10 лица, вклучително и двајцата возачи, се во болница со веројатно сериозни повреди, соопштија официјални лица. РЦМП побара од возачите да ја избегнуваат областа бидејќи неколку километри автопат беа затворени во близина на местото на несреќата.
„Срцето ми се скрши кога ја слушнав веста за трагичната несреќа кај Карбери“, напиша на Twitter премиерката на Манитоба, Хедер Стефансон.
Доколку се потврди бројот на жртвите, ова ќе биде една од најсмртоносните сообраќајни несреќи во поновата историја на Канада.
На рурален пат во Саскачеван, соседна провинција, 16 лица загинаа во април 2018 година откако камион удри во автобус кој превезуваше јуниорски хокеарски тим. Во 2019 година, возачот на камионот беше осуден на 8 години затвор.
