Римејкот на мјузиклот „West Side Story“ лесно се најде на врвот на бокс-офисот, но со слаба заработка. Во првиот викенд од прикажувањето филмот во режија на Стивен Спилберг заработи 10 милиони долари, многу помалку од очекуваното.
Продукцијата на мјузиклот Спилберг го чини 100 милиони долари, но за него е потрошено многу повеќе за промовирање. Иако доби позитивни критики и многумина му предвидуваат номинации за Оскар, филмот доби забрана за прикажување во неколку земји на Блиски Исток како Саудиска Арабија, Обединети Арапски Емирати, Катар, Бахреин, Оман и Кувајт.
Музичката адаптација на Спилберг наиде на цензура и критики поради наводно вклучување на трансродов лик. Регионалните извори тврдат дека до одлуката дошло поради лик напишан како трансродов во новата адаптација.
Разочарувачките бројки за „West Side Story“ не се први меѓу овој жанр во време на пандемија. „In the Heights“ заработи 11.5 милиони долари, додека „Dear Evan Hansen“ 7.4 милиони, многу под очекувањата за двата филма.
Трет викенд по ред „Encanto“ на Disney бележи солидна заработка, овој пат со 9.5 милиони долари. На трето место е „Ghostbusters: Afterlife“ со 7.1 милион долари, а по него следуваат „House of Gucci“ со 4 милиони долари и „Eternals“ со заработка од 3,1 милион долари.