Американскиот новинар Грент Вол почина во Катар на 49-годишна возраст на синоќешниот натпревар меѓу Холандија и Аргентина.
Вол беше еден од најугледните американски спортски новинари, а колабираше во прес-кабината додека го гледаше синоќешниот четвртфинален натпревар од Светското првенство.
Веднаш бил префрлен во болница, но лекарите не успеале да му го спасат животот.
Тој остана во Катар и откако репрезентацијата на САД беше елиминирана од турнирот, а засега не е позната причината за неговата смрт.
Вол на светската јавност ѝ стана познат кога на самиот почеток на Мундијалот беше меѓу приведените кои се обидоа да влезат на стадионите облечени во маици со бои на виножитото за да ја поддржат ЛГБТ заедницата.
Во текот на својата новинарска кариера Вол работеше за Miami Herald, Sports Illustrated и Fox Sports. Автор е на книгата „The Beckham Experiment“ (2009).