Информациите кои доаѓаат од Аргентина велат дека Напола одбил да учествува на претстојниот прв меморијален куп во чест на починатиот Диего Армандо Марадона.
Марадона купот ќе се игра на 14 декември во Саудиска Арабија и ќе се сретнат Барселона против Бока Жуниорс, два од клубовите каде остави печат со своите игри.
Натпреварот ќе се одржи на „Кинг Сауд“ стадионот во главниот град Ријад, кој е со капацитет од 25.000 гледачи и кој поради спонзорство се нарекува уште и „Мрсул“.
Бока Жуниорс и Барселона се дел од богатата кариера на Марадона, но најголемите успеси ги постигна носејќи го дресот на Наполи. Поради тоа се очекуваше клубот од Неапол да земе учество на првиот ваков меморијален куп, поради што многумина останаа изнеадени од одлуката на „Партенопеите“.
Според информациите кои ги пренесуваат аргентинските и италијанските медиуми, има две причини поради кои во Наполи се одлучиле за ваков непопуларен чекор.
Првата е густиот распоред поради кој за тимот е тешко изводливо во средината на декември да оствари патување до Саудиска Арабија.
Второ, Наполи не склучил договор со агенцијата која го организира купот. Бока и Барса ќе добијат по милион евра за учеството, а наводно Аурелио Де Лаурентис барал Наполи да добие 5 милиони евра, што било неприфатливо за организаторот.
Наполи сепак има намера со своја организација да му одаде почит на својот легендарен фудбалер, во чија чест го преименува и својот стадион „Сан Паоло“. Имено, Наполи планира во периодот крај на декември почеток на јануари да организира натпревар со Архентинос Жуниорс, првиот клуб во кариерата на Марадона.
Марадона има играно уште и за Севиља и Њуел'с Олд Бојс. Најмногу трофеи освои со Наполи: 2 Скудета, 1 Копа Италија, 1 Суперкопа и 1 УЕФА куп. Диего почина на 25 ноември минатата година.
