Компанијата на Илон Маск, SpaceX, го доби договорот за услуги во износ од 178 милиони долари што НАСА ќе ги вложи во мисија на месечината Европа на Јупитер.
Станува збор за прва мисија на НАСА на Европа и целта е да се утврди дали на неа има услови за живот. Во текот на мисијата ќе се спроведе детално истражување на Европа, која е малку помала од нашата Месечина.
Мисијата Europa Clipper ќе почне во октомври, 2024 година со ракетата Falcon Heavy на SpaceX.
„Меѓу многуте цели на мисијата се и фотографии во висока резолуција од површината на Европа, утврдување на составот, барање на докази за геолошка активност, мерење на дебелината на ледот, утврдување на длабочините на океанот и слично“, наведе НАСА.
Договорот означува доверба на НАСА кон SpaceX, а веќе има соработка поврзана со превоз на астронаути на Меѓународната вселенска станица.
SpaceX во април доби договор вреден 2,9 милијарди долари за изградна на вселенско летало за програмата Artemis за мисија на Месечината. Но, договорот беше суспендиран по протестот на Blue Origin и Dynetics.
