Суперкомпјутерската симулација сугерира дека се Месечината се формирала доста брзо откако поголемо тело удрило во Земјата.
Месечината можеби се формирала во часови, наместо со месеци или години, како што вообичаено се верува, според напредниот астрофизички модел смислен од научниците на НАСА во соработка со научници од англискиот Универзитет во Дурам, а со помош на суперкомпјутери. Струдијата беше објавена минатата недела во списанието Astrophysical Journal Letters, пренесува RT.
Користејќи повисока резолуција отколку што беше достапна во времето кога беше осмислена општоприфатената теорија за потеклото на Месечината, во која тело со големина на Марс наречено Теја удира во примитивната Земја пред околу 4,5 милијарди години, а отпадот што се добива се спојува во Месечина во период од месеци или години, моделот покажува дека сателитот се формирал од материјал кој потекнува и од Земјата и од Теја и тоа многу побрзо отколку што се мисли.
Симулацијата покажува дека Теја, планета со големина на Марс, се судрила со мини-Земјата. Надворешната кора на двете планети поради силината на ударот летнува во орбитата, брзо спојувајќи се во два нестабилни сателити, од кои помалиот се стабилизира во Месечината, додека поголемиот повторно се апсорбира во Земјата.
Новата теорија помага да се објасни зошто Месечината дели сличен минерален состав со Земјата, особено кон нејзината кора - атрибут што е тешко да се објасни ако се претпоставува дека е речиси целосно составена од остатоци од Теја, како што смета преовладувачката теорија.
Другите постоечки теории кои се обидуваат да ја објаснат сличноста во хемискиот состав помеѓу Земјата и нејзиниот сателит, како што е теоријата на синестија која сугерира дека Месечината е формирана во вител на испарувана карпа од судирот на Теја со Земјата, не ја објаснуваат нејзината орбита на задоволително ниво.
НАСА се надева дека ќе користи слично напредно моделирање со висока резолуција во врска со новите примероци донесени од нејзините планирани мисии Artemis за тестирање на оваа и другите теории за еволуцијата на Месечината. Астронаутите на Artemis, долго најавуваното враќање на американската вселенска агенција во вселенските мисии со екипаж, ќе имаат задача да земат примероци од подлабоко под површината на Месечината, како и од ретко истражените делови на сателитот, иако лансирањето и понатаму е загрозено од доцнења и технички неисправности.
