Скелет откриен во оддалечен дел на Борнео ја препишува историјата на античката медицина и докажува дека најстарата позната хируршка ампутација на екстремитет била успешно изведена пред околу 31.000 години, објавија австралиските научници во средата.
Најраната досега позната ампутација на подлактица е снимена на скелет стар 7.000 години пронајден во Франција во 2010 година, а до сега експертите претпоставуваа дека таквите операции се вршеле исклучиво во населени земјоделски области.
Сепак, откритието покажува дека ловците-собирачи од каменото време кои живееле во денешната индонезиска провинција Источен Калимантан поседувале софистицирано медицинско знаење за анатомија и заздравување на рани.
„Тоа го менува нашето разбирање за развојот на оваа гранка на медицината“, рече Тим Малони, научен соработник на австралискиот Универзитет Грифит, кој го предводеше истражувањето.
Скелетот е откриен во 2020 година во импозантната пештера Лианг Тебо позната по ѕидните слики стари 40.000 години.
Опкружени со лилјаци и повремено скорпии, научниците макотрпно го отстранувале талогот за да откријат исклучително добро сочуван скелет. Недостигале само левиот глужд и стапалото.
Основата на преостанатата коска на ногата имала необична форма, груткаст израсток над очигледно чистата фрактура, што укажува дека и глуждот и стапалото биле намерно отстранети.
„Пресекот на коската е многу уреден и направен накосо..., всушност можете да ја видите површината и обликот на засекот низ коската“, рече Малони на прес-конференција.
Други објаснувања за изгледот на коските, кои би можеле да бидат резултат на напад на животно или повреда од згмечување или паѓање, би ја предизвикале фрактурата, а заздравувањето би било различно од пронајдената состојба на скелетот.
Забот и околниот талог покажале дека скелетот бил стар најмалку 31.000 години и му припаѓал на лице кое починало на околу 20-годишна возраст.
И покрај неверојатната траума од ампутацијата, се чини дека личноста преживеала уште 6 до 9 години по неа. Тие дошле до овој заклучок врз основа на набљудувањата за повторното растење на коските на нозете. Научниците веруваат дека личноста не претрпела голема постоперативна инфекција.
