Лидерот на руската опозиција и затвореник Алексеј Навални е префрлен на непозната локација од казнено-поправниот дом каде што издржува затворска казна од две и пол години, изјави денеска негов соработник.
„Не знаеме каде е сега Алексеј или во која казнена колонија е пренесен“,објави наTelegram Леонид Волков, лидер на тимот на Навални.
Навални, најпознатиот опозициски лидер во последните десет години, беше уапсен во февруари 2021 година при враќањето од Германија каде што се лекуваше од обид за труење со нервен агенс, за кој рече дека бил извршен по наредба на Кремљ.
Навални беше повторно осуден на 24 март, овој пат на девет години затвор под обвинение за измама и непочитување на судот, а тие обвиненија ги отфрла како политички измислени за да се ограничат неговите политички амбиции.
Судијата нареди Навални, кој јавно ја осуди руската воена агресија врз Украина, нарекувајќи ја „глупава“, да биде пренесен во казнено-поправен дом со максимална безбедност, каде што ќе му бидат намалени правата на посети и контакти.
Навални ја отслужи казната во Колонија 2, затвор во Покрово, 119 километри источно од Москва.
Откако е во затвор, руските власти во голема мера ја разбиле политичката мрежа што тој ја создал, повикувајќи се на обвинувања дека неговата организација е „екстремистичка“.
Најблиските соработници и организатори на Навални сега се или во затвор или принудени на егзил.
Пред две недели против Навални беше покренато ново обвинение, овој пат за основање екстремистичка организација и поттикнување омраза против властите, за што може да добие максимална казна од уште 15 години затвор.
Кира Јармиш, неговата портпаролка, на Twitter објави дека адвокат се обидел да го посети во затвор. По неколку часа чекање, затворскиот персонал го информирал дека „нема затвореник под тоа име“.
