Рускиот опозициски лидер Алексеј Навални, кој се лекува во берлинска болница каде долго време беше во кома, вели дека сака да се врати во Русија, пишува New York Times.
Весникот се повикува на германски извори според кои Навални на обвинителот му открил што планира да направи откако ќе закрепне.
„Нема намери да биде во егзил во Германија. Сака да се врати дома во Русија и да ја продолжи својата мисија“, откри службеник на германските безбедносни служби. „Свесен е за неговата состојба, за тоа што му се случило и знае каде се наоѓа“, вели анонимниот службеник.
Болничарите кои го лекувале Навални на почетните тестови не утврдиле зголемување на шеќерот во крвта и не виделе знаци на метаболичко нарушување, потврдија за Reuters пет медицински извори.
Нивните извештаи се во спротивност со поставената дијагноза јавно објавена од руските доктори во Омск каде беше лекуван отруениот Навални.
Подоцна, кога беше одведен на лекување во Германија, тамошните лекари изјавија дека е отруен од реткиот нервен гас – новичок.