Најмалку 8 руски тајни агенти на ФСБ учествувале во труењето на Алексеј Навални, тврдат медиумите во опсежно истражување. Меѓу нив е и германскиот Spiegel.
Најголемиот критичар на Кремљ, Навални, очигледно бил отруен во текот на комплексна операција изведена од тајни руски агенти, ова го тврдат неколку меѓународни медиуми кои ги истражуваа околностите на труењето на рускиот политичар. Идентификувани се најмалку 8 агенти на ФСБ, пишува германскиот магазин Spiegel; кој учествуваше во истражувачките платформи Bellingcat и The Insider.
Станува збор за 6 агенти кои непосредно ја извеле акцијата и уште двајца кои раководеле со операцијата. Навални преку Instagram зборуваше за тие извештаи.
„Знам кој сакаше да ме убие“, напиша тој и објави фотографија од 8 мажи.
Spiegel пишува дека на основа на анализа на податоци за користење мобилни телефони, GPS и слични податоци за локации, односно со анализа на бројни листи на авионски патници, може да се реконструира дека Навални уште од 2017 година бил мета на тим од ФСБ. Тајните агенти повеќе од 30 пати летале пред него на целта на која патувал и Навлани и потоа кратко по него се враќале во Москва.
Двајца мажи за кои се наведува дека раководеле со операцијата наводно се членови на две единици на ФСБ кои во минатото биле поврзани со убиства со труење, станува збор за Институтот за криминалистика и Центарот за специјална техника. Една од тие личности редовно комуницирала со хемиските лаборатории кои се доведуваат во врска со руската новичок-програма.
Сите 8 агенти биле активни во медицински или хемиски сектор, односно работеле за руските специјални единици.
Во интервју за DW, Арик Толер, репортер од Bellingcat, зборуваше за тие истражувања. Тој тврди дека тие не се обични агенти на ФСБ, туку минале обука за користење хемиско оружје.
Според наводите на три европски лаборатории, Навални бил отруен со нервен гас од групата новичок. Навални сега е во Германија на рехабилитација и најави дека сака да се врати во Русија.
Кремљ демантира каква било поврзаност со случајот, а рускиот претседател Владимир Путин вели дека ќе се почне со истрага дури откако се појават докази дека станува збор за злосторство.
„Јас сум сосема сигурен дека Путин бил свесен за операцијата“, изјави Навални во интервју за CNN.
