За прв пат по повеќе од 10 години Netflix нема раст, туку огромен пад од над 200.000 изгубени корисници, што предизвика остри реакции од пазарот, но и на компанијата.
Сите кои си делат Netflix кориснички профили и не плаќаат целосен износ за претплата нека се подготват за губење на оваа можност. Netflix најави дека тргнува во лов на луѓе кои ги делат своите кориснички профили, но ова е само една од мерките кои ќе ги преземе за да го задржи успехот во работењето.
Периодот во кој Netflix за прв пат во историјата не го зголеми бројот на претплатниците се однесува од почетокот на годинава до крајот на март, што предизвика пад на акциите на компанијата од дури 23%.
По рекордниот скок во пандемијата, менаџментот прогнозираше дека во овој период ќе добие 2,5 милиони нови претплатници, но ова не само што не се случи, туку е забележан историски пад.
Сега, менаџментот предвидува дека и во вториот квартал од годинава падот ќе продолжи и дека од април до јуни сервисот ќе го напуштат околу 2 милиони корисници.
На ова многу влијае и војната во Украина, па бројот на откажани претплати од Русија и Украина е околу 700.000. Конкуренцијата се засилува глобално, па HBO Max има успеси ширум светот и дава премиери на блокбастери само 45 дена по премиерата во кино. Успешен е и Amazon Prime.
Netflix официјално има преку 222 милиони претплатници и уште околу 100 милиони луѓе кои го делат корисничкиот профил со некој од овие во првата бројка.
