Комедијата за учител кој станува претседател со Володимир Зеленски во главната улога повторно стана достапна на платформата Netflix.
Netflix официјално објави дека, според барањата на гледачите, серијата „Слуга народу“ со Вoлoдимир Зеленски е вратенa во каталогот на овој стриминг сервис во САД и Европа. Засега во некои европски држави достапна е само првата од трите сезони, а Netflix веројатно ќе ги додаде другите две доколку се покаже популарна.
„Слуга народу“, позната и под англискиот наслов „Servant of the People“, се емитуваше на платформата Netflix од 2017 до 2021 година, а од вчера е повторно достапна. Официјалните канали на платформата велат дека оваа серија повторно е дел од каталогот на барање на гледачите, но станува збор за компанија чиј број на нови корисници веќе некое време не расте, па не би се изненадиле доколку Netflix реши да ја искористи ситуацијата во Украина за да заработи некој долар.
Пред да се вклучи во политиката, Зеленски пишуваше сценарија за комедии, серии и филмови и работеше како нивен продуцент. Од 2015 до 2019 година беше главна улога во серијата „Слуга народу“, која следи наставник кој станува претседател на Украина по едно вирално видео во кое се жали на корупција.
Кога за претседател е избран Василиј Петрович Голобородко, ликот кој го игра Зеленски, тој ја презема целосната реформа на државата, борбата против корупцијата и обединувањето на нацијата, и покрај отпорот на политичарите кои ги штитат интересите на моќните олигарси.
Не е доволно да се каже дека серијата беше популарна во Украина и Русија, бидејќи беше клучот за кампањата на Зеленски. Имено, третата и последна сезона беше емитувана во март 2019 година, на само неколку дена пред првиот круг од изборите во Украина, а промоцијата на серијата се совпадна со претседателската кампања.
Со оглед на големата популарност и сличност на она што беше во кампањата со серијата, која тогаш беше на врвот на својата слава, Зеленски беше избран за претседател во 2019 година со повеќе од 70% од гласовите на народот на Украина. Подоцна истата година, неговата нова партија, именувана по популарната серија, освои мнозинство во парламентот, овозможувајќи два клучни столба на моќта во земјата.
Набргу по руската инвазија луѓето ширум светот покажаа голем интерес за оваа серија, која стана популарна во Германија, Франција, Обединетото Кралство, Грција и други европски земји, а неодамна и во САД. Од 22 март ќе почне емитувањето и во Албанија на ТВ каналот Tring.
