Дерби дуелот од 1. коло во Г групата од Африканскиот куп на нации помеѓу титаните на Црниот континент заврши со минимална победа на Нигерија.
Египет, кој е најтрофејна африканска репрезентација, претрпе пораз во својот прв натпревар на континенталниот собир во Камерун. Ниту Мохамед Салах не им помогна на „Фараоните“ во дуелот со Нигерија која запиша 3 бода благодарение на погодокот на Келечи Ихеаначо по точно половина час игра.
Во прилично тврдиот натпревар Египќаните немаа решение за нигериската одбрана и само двапати успеаја да го натераат голманот Мадука Окоје да интервенира. Нигеријците беа поактивни и во повеќе наврати итаа кон египетскиот гол.
Вториот натпревар од оваа група се игра вечерва од 20 часот, а се среќаваат Судан и Гвинеја-Бисау.
Во наредното коло на 19-ти играат Египет - Судан и Гвинеја-Бисау - Нигерија.