Кристијано Роналдо требаше утре да дебитира за Ал Наср на натпреварот од 12. коло од Саудиската лига против Ал Тае, но нема да може да настапи на тој натпревар, пишува Daily Mail.
Англиската фудбалска асоцијација го казни Кристијано Роналдо со 50.000 фунти и два натпревари, откако на трибините му го скрши мобилниот телефон на едно момче по натпреварот против Евертон во април минатата година.
Англиската федерација му ја изрече казната на Роналдо во ноември, непосредно пред паузата поради Мундијалот. После тоа Роналдо го раскина договорот со Јунајтед и не ја „одлежа“ суспензијата од два натпревари која според правилата на ФИФА мора да ја одлежи во следниот клуб во домашните натпреварувања, што го потврди и англиската ФА по објавувањето на казната.
Ал Наср продаде 28.000 билети за натпреварот против Ал Тае, но навивачите нема да го видат Роналдо на дело. Португалецот ќе биде на трибините и ќе ги гледа новите соиграчи, но нема да може да игра. Доколку нема голем пресврт, Роналдо треба да го пропушти и големото дерби со Ал Шабаб на 14 јануари, а првиот натпревар во новиот дрес треба да го одигра на 21 јануари против Ал Етифак.