Јапонски истражувачи докажаа дека маските можат да заштитат од честички на коронавирусот во воздухот, но дури ни маски од професионален квалитет не можат целосно да го елиминираат ризикот од зараза.
Научници од Универзитетот во Токио изградија безбедносна комора со кукли, свртени една кон друга. Една глава, опремена со распрскувач, симулира кашлање и исфрлање вистински честички од коронавирусот. Друга кукла имитира природно дишење со комора за собирање вируси кои минуваат низ дишните патишта.
Резултатите покажале дека памучната маска го намалува ризикот од примање на вирусот до 40 проценти во однос на ситуација кога воопшто нема маски. Медицинската маска N95 која ја користат медицинските експерти, ги запира честичките од вирусот до 90 проценти. Меѓутоа, дури и кога маската N95 во целост е припиена за лицето, некои честички од вирусот сепак успеваат да се вовлечат.
Кога маската е ставена на главата на куклата која кашла, памучните и хируршките маски блокираат повеќе од 50 проценти од честичките.
Други јапонски научници, со помош на суперкомпјутерски симулации, покажаа дека влажноста на воздухот влијае на тоа како вирусните честички се шират низ воздухот.
