Израелски научници открија впечатливи разлики во ризикот од тешка форма на болеста COVID-19, кога ги споредуваа пациентите кои имале доволно нивоа на витамин Д пред да се заразат, со оние кои немале.
Студијата објавена во списанието PLOS One покажа дека околу половина од луѓето на кои им недостигал витамин Д пред да добијат COVID-19, развиле потешка форма на болеста во споредба со помалку од 10 проценти од луѓето кои имале доволно нивоа на витаминот во крвта.
Знаеме дека витаминот Д е од големо значење за здравјето на коските, но неговата улога во заштитата од тешкиот COVID-19 е помалку позната.
Најновата студија е прва што ги испитува нивоата на витамин Д кај поединци пред да се заразат со COVID-19, велат авторите на студијата.
„Откривме дека е неверојатно и запрепастувачки да се види разликата во ризикот на едно лице да се разболи со тешка форма на болеста кога има недостаток на витамин Д во споредба со некое лице кое има доволно нивоа на овој витамин“, вели авторот на студијата за Times of Israel.
Авторите велат дека резултатите сугерираат дека витаминот Д помага имунолошкиот систем да се зајакне за да се справи со вирусите кои го напаѓаат респираторниот систем.
„Ова е релевантно за омикрон како и за претходните соеви“, велат тие.
Истражувањата не докажуваат дека витаминот Д штити од COVID-19 и не е зелено светло за избегнување вакцини и земање витамини. Вакцините го намалуваат ризикот од хоспитализација поради омикрон, особено по бустер дозата, до 90 отсто, според Британската агенција за здравствена безбедност.
Повеќето витамин Д доаѓа од директното изложување на кожата на сончева светлина. Го има и во храната како што се мрсна риба, печурки и жолчки од јајце, како и суплементи.
Продолжете да читате: Кои се симптомите дека ви недостига витамин Д?