Луѓето кои се дебели, високи или ниски во американскиот град Њујорк ќе бидат заштитени од дискриминација според законот што го потпиша градоначалникот Ерик Адамс, мерка за која неговите застапници се надеваат дека ќе биде спроведена и во други градови.
Законот, воведен од градскиот советник Шон Абреу, забранува дискриминација врз основа на висина и тежина на работното место и во пристапот до јавното и приватното сместување.
„Не треба да е важно колку сте високи или тешки. Кога барате работа или сте надвор во градот или се обидувате да добиете некој вид сместување или стан за изнајмување, не треба да бидете третирани поинаку“, рече Адамс.
Законот стапува на сила за шест месеци и ги надополнува постоечките мерки за заштита од дискриминација врз основа на раса, религија, боја, национално потекло и пол, меѓу другото.
